Sæl öll !!

Héðan er allt gott að frétta, búið að manna í allar stöður.
Við fórum í í Hörpuna á minningartónleika Freddy Mercury það eru 20 ár síðan þessi stórstjarna féll frá. Það voru margir listamenn sem komu fram og voru þeir hver að öðrum betri, þetta er tónlistarfólk á heimsmælikvarða og má þar nefna Eyþór sem bar af í söng og framkomu algjör snillingur !! svo komu fram Matti Matt, Eiríkur Hauks, Friðrik Ómar, Magni, mjög góð óperusöngkona, raddsveit Reykjavíkur og góðir tónlistarmenn stóðu á bakvið söngvarana. Geggjaðir tónleikar í alla staði. 
Erna var svo rausnarleg að bjóða okkur Hrólfi á Gamla Vínhúsið í nautasteik og rauðvín
Hulda systir heldur svo upp á 55 ára afmælið sitt annað kvöld með stæl. Til hamnigju með afmælið elsku Hulda
Góða helgi og gangið hægt um gleðinnar dyr en ekki við

kv Kiddi og Erna
 

Komið þið sæl og blessuð
Héðan er allt gott að frétta. Mezzaforte tónleikarnir í Hörpunni stóðu undir sínu, frábærir tónleikar enda fagmenn í hæsta gæðaflokki.
Helgina 16 til 18 september síðastliðinn fórum við vestur á Ísafjörð ásamt Þóru, Möggu, Gulla og Ernu í fimmtugsafmæli hjá Trausta frænda. Við keyrðum vestur á föstudeginum. Það  kvöld var okkur boðið á Tjöruhúsið í sjávarréttarhlaðborð. Maturinn var æðislegur en aðgengið hrikalegt enda eldgamall kofi, en því var reddað með spýtum og starfsmönnum Tjöruhússins. Trausti og Magnús voru búnir að umturna heilmilinu fyrir fatlaða manninn og kaupa nýtt rafmagnsrúm. Það var sko vel tekið á móti okkur og þökkum við kærlega fyrir gestrisnina. Á laugardeginum var sofið út eftir svefnlausa nótt. Kiddi, Magnús og Erna skelltu sér í bæinn og skoðuðu sig um í miðbæ Ísafjarðar í blíðskaparveðri. Svo var því tekið rólega á heimili Trausti fram að afmælispartýi aldarinnar
Veislan var haldin á Núpi í Dýrafirði sem áður var heimavistarskóli og er nú rekið sem hótel. Boðið var upp á fordrykk og svo glæsilegt hlaðborð með öllu tilheyrandi.......
Ýmiss skemmtiatriði voru í boði og hélt hljómsveitin Hjónabandið uppi stuði fram á nótt.
Kallinn dansaði af sér rassgatið á hjólastólnum og var sauðölvaður
Geggjað kvöld í góðra vina hópi. Takk kærlega fyrir okkur.
Á sunnudeginum var haldið á heimleið og allir ótrúlega spenntir fyrir keyrslunni heim eða þannig....
Nýjar myndir undir myndasöfn og albúmið heitir fimmtugsafmæli Trausta og páfagaukurinn Kúti !!

Kv Kiddi og co

Héðan er allt gott að frétta. Erna var að koma úr 4 daga fríi frá Danaveldi.
Þeir Trausti og Magnús frændur mínir koma hingað af og til og gerum við okkur eitthvað til dundurs.
Kúti páfagaukur er allur að koma til, vill bara vera á stólnum hans Kidda og rúnta og skíta á kallinn ...
Það var haldið upp á tvítugs afmælið hennar Katrínar frænku  þann 31. ágúst síðastliðinn með pompi og prakt
Svo er það alltaf sama tuggan, boltinn um helgar, sjúkraþjálfun og rúntað um bæinn í góðu veðri. Börnin og barnabörnin láta alltaf sjá sig reglulega sem er bara gaman. 
Á morgun ætlar kallinn að skella sér á Mezzaforte tónleika í hörpunni ásamt þeim fegðum Hreiðari og Hrólfi og Berki tengdasyni Hreiðars. 
Það eru komnar myndir undir myndasöfn merkt ýmsar myndir 2011. Þar má sjá myndir frá víkingahátiðinni og úr Hafnarfirði sem Magnús og Trausti tóku í sumar. Svo eru nokkrar fallegar myndir frá Siglufirði sem Böðvar Árnason húsasmiðameistari og áhugaljósmyndari með meiru, faðir Ernu tók á ferðalagi sínu um landið í sumar. 

Góða helgi og gangið hægt um gleðinnar dyr
kv Kiddi og co 


  

 

Nú er allt að smella saman eftir sumarfrí, þá getum við farið að blogga að fullum krafti.
Kallinn er búinn að hafa það fínt í sumar, notar alla góðviðrisdaga til útivistar. 
Heilsufarið er ágætt miðað við aðstæður, hendurnar reyndar farnar að klikka, maður getur víst ekki pirrað sig á því þetta er gangur sjúkdómsins......
Magnús og Trausti frændur eru búnir að vera hér með annan fótinn í allt sumar, þetta eru fríðir og skemmtilegir feðgar  
Fuglinn Kúti dafnar vel, það gengur erfiðlega í uppeldinu fyrir Ernu greyið að fá hann á puttann hann goggar bara í hana. Kidda gengur betur og rúntar með hann á stólnum inni.
Hringferðin hjá Einari gekk vel þrátt fyrir ýmsar hindranir í upphafi. Og vil ég koma á framfæri þakklæti mínu til hans, þú er snillingur Einar  
 Ótrúleg en satt skellti Kiddi sér á gay pride síðastliðinn laugardag í glimmergallanum ,nei djók. Þóra systir sótti kappann í blíðskaparveðri. Það var gaman að upplifa þetta í fyrsta skiptið, þarna var samankominn mesti fjöldi fólks sem ég hef séð. Steini frændi sonur Þóru systir og Jóri sambýlismaður Steina voru flottir í glimmergallanum í bílnum hans Ómars Ragnarssonar, til hamingju með daginn strákar

kv Kiddi og co

Einar er að ljúka hringnum næstkomandi laugardag. Tekið verður á móti honum í Furulundi í Heiðmörk klukkan 12 og verður boðið upp á pulsur og kók. Við skorum á alla að mæta, sem geta.

   Einar frændi lagðu af stað að hjóla hringinn til styrktar okkur systkyninum.
Ég skora á alla að taka þátt í fjáöfluninni.
Hægt er að fylgjast með á http://asumumasigrast.is/ og 
http://www.facebook.com/#!/asumumasigrast

Áheitasögnun
Hringdu eða sendu SMS í númerið
904 - 1407
og gefðu þeð því 1407 Kr.

Einnig frjáls framlög á reikning
0130 - 26 - 5405
Kt. 540509 - 0690

„Auk þessa gríðarlega áfalls sem sjúkdómurinn er, þá er baráttan við hann kostnaðarsöm og við þetta bætast peningaáhyggjur. Þess vegna langaði mig til þess að gera eitthvað til að verða að liði.“ Þetta segir Einar Þ. Samúelsson, tæplega fertugur fjölskyldumaður úr Kópavogi, sem 2. júlí næstkomandi, heldur af stað hjólandi í hringferð um landið.
Tilgangurinn er að safna áheitum til styrktar Kristni Guðmundssyni og aðstandendum systur hans, Bjargar Guðmundsdóttur. Þau Björg og Kristinn hafa bæði hafa glímt við hinn banvæna MND sjúkdóm, sem veldur ólæknandi taugahrörnun.
Gengur í erfiðir
Björg lést úr krabbameini 7. júní síðastliðinn eftir að hafa háð erfiða baráttu við bæði krabbameinið og MND. Kristinn glímir enn við MND. Hann er bundinn við hjólastól og er algjörlega upp á aðra kominn.
MND virðist ganga í erfðum innan móðurfjölskyldu Einars. Hulda, systir Bjargar og Kristsins, hefur einnig greinst með sjúkdóminn. Hún er blessunarlega einkennalaus og, sem betur fer, fá  hann ekki allir í fjölskyldunni.
Fagnar afmæli sonarins á hringveginum
Einar er systursonur þessa fólks. Hann er þriggja barna faðir úr Kópavogi og rekur litla auglýsingastofu. Hann hefur hjólað nokkuð, sérstaklega frá hruni, þegar bensínverð tók kipp upp á við. Hann áætlar að hringferðin taki hálfan mánuð en hann mun fagna eins árs afmæli yngsta sonar síns á Akureyri, gangi ferðin samkvæmt áætlun.
Einar leggur af stað í hringferðina frá Furulundi í Heiðmörk laugardaginn 2. júlí, kl. 7.
Króna á hvern kílómetra
Hægt er að heita á Einar með því að hringja eða senda sms í númerið 904 1407. Með því er gefin ein króna fyrir hvern kílómetra sem Einar hjólar, alls 1407 krónur. Sú er lengd hringvegarins með Hvalfirði, en hann mun Einar hjóla allan.
Fylgstu með á netinu
Verkefnið hefur fengið nafnið „Á sumu má sigrast“ og má finna allt um það auk leiðarinnar sem Einar hjólar og áningarstöða á heimasíðunni:

    Kiddi og Hrólfur fóru saman í Eagles tónleika í laugardagshöllinni þann 9. júní.
Tónleikarinir voru geggjaðir enda fagmenn þar á ferð. Kiddi og Hrólfur voru á besta stað sem var ætlað fyrir hjólastólastólafólk og sáu vel á sviðið. 
    Svo skellti Kiddi sér í Hörpuna á tónleika með Helga Björns og félögum og var það í boði Kristjáns, Stefáníu og Hlyns, kærar þakkir fyrir frábæra tónleika. 
    Svo er vestfjarðarliðið þeir feðgar Magnús og Trausti búnir að vera hér í góðu yfirlæti síðastliðinn hálfan mánuð. 
    Kiddi er búinn að fá sér nýjan félaga og er það páfagaukurinn Kúti eins og hann er kallaður. Kúti er allur að koma til og er venjast aðstæðum hér á bakkanum .

kveðja Kiddi, Kúti og co

    Begga systir mín lést á líknardeild Landspítalans í Kópavogi þann 7. júní síðastliðinn. Eins og flestir vita var Begga með Mnd og krabbamein og hennar banamein var krabbameinið. Hennar verður sárt saknað enda töluðum við saman daglega og stundum tvisvar á dag.
Síðustu vikur hafa verið mjög erfiðar. Hún var jarðsungin þann 20. júní í Kópavogskirkju við fallega athöfn. Séra Gunnar sem hefur fylgt okkur gegnum þessi erfiðu veikindi sá um athöfnina og vil ég senda honum mínar bestu þakkir fyrir stuðninginn undanfarin ár.
 
  kveðja Kiddi

Nýjar myndir frá Tenerife undir myndasöfn Tenerife 2011

Jæja þá er maður mættur á klakann eftir geggjaða ferð .
Við fórum út  seinnipartinn þann 17. maí. Ferðin gekk vel út, dáldið þröngt í vélinni en það hafðist. Við vorum komin út rétt fyrir miðnætti. Góð aðstaða er fyrir fatlaða og fólk í hjólastólum út á flugvellinum, nokkrir galvaskir menn sem sjá eingöngu um hjólastólstólafólk tóku á móti okkur og fylgdu alla leið út í bíl, þvílíkt góð þjónusta
Hótelið okkur var bungalows íbúðir og heitir það Paraqe Cristóbal. Við vorum í þriggja herbergja  íbúð sem er sérútbúin fyrir fatlaða. Allt gekk að óskum þar til stóllinn klikkaði og hlóð sig ekki. Höfðum við þá  samband við þjónustu hótelsins og fengum við flotta þjónustu. Þeir tóku stólinn og lagfærðu hann og Kiddi fékk lánsstól á meðan b týpu og lét sig bara hafa það, það var ekkert annað í boði og skellti í sig nokkrum köldum til að halda sönsum hehe, Stóllinn kom til baka 2 dögum síðar eins og nýr og brosti þá kjellinn hringinn. Við kynntumst æðislegu fólki frá sambýli í Grindavík og vorum við mikið saman.
Einnig kynntumst við fullt af íslendingum sem á hótelinu voru. Erna og Fjóla misstu í búðunum og fékk kallinn að dúsa fyrir utan þær og bíða í tíma og ótíma.
 Við vorum dugleg að skoða okkur um í nágrenninu og góðir stígar eru um allt og meðfram ströndinni. Kiddi komst allra leiða sinna og inn á alla staði Mikið er gert fyrir fatlaða  og fjölskyldufólk þarna og öll aðstaða til fyrirmyndir. Góð þjónusta fyrir fatlaða og hægt að leigja allsskonar græjur og þjónusta allan sólarhringinn. Við vorum í hálfu fæði á hótelinu og var maturinn mjög góður. Það var skýjað á köflum og mjög þæginlegur hiti svo náði sólin að rífa sig í gegnum skýin seinnipartinn. Fjóla og Erna skelltu sér í mollið í verslunarferð með íslenskum konum í rútu. Kiddi var í góðu yfirlæti hjá gæslumönnum Grindavíkur á meðan, takk fyrir pössunina kæru vinir. 
Ferðin heim gekk mjög vel það var næturflug. Fengum Iron Maiden vélina heim og var hún hálftóm og gat fólk lagt sig á heimleiðinni. Kiddi gat lagt sig í einu 3 sæta á leiðinni heim. Svo þegar heim var komið um fimmleytið um morguninn var enginn rani laus svo það þurfti að hífa hjólastólafólkið niður í lyftu út í rigninguna, ekki alveg málið. 
Semsagt frábær ferð í góðra vina hópi og vil ég þakka Ernu og Fjólu fyrir alla aðstoðina og fyrir að umbera kallinn allan þennan tíma. Þið eruð bestar
Kv Kiddi og co
 Einnig viljum við koma þakklæti til þeirra sem gerðu okkur kleift að komast í þessa ferð.
Hólshús bættist við sem styrktaraðili í lokin kærar þakkir fyrir stuðninginn

 Nú styttist í ferðina okkar til Tenerife og er mikil spenna á bakkanum.
 Við Kiddi, Erna og Fjóla viljum þakka þeim sem gera okkur kleift að komast í þetta ferðalag. Eftirtalin félög styrktu okkur þau eru Fit ( félag iðn -og tæknigreina ), Lionsklúbburinn Ásbjörn og frá Meistarafélagi Hafnarfjarðar voru eftirtaldir Rafeining ehf, Snorri pípari og G.I. múr.                                                                     
Bestu kveðjur
Kiddi, Erna og Fjóla  

Það eru komnar nýjar myndir undir myndasöfn Knútur eldar

Magnús frændi frá Ísafirði kom á föstudag og gisti yfir helgina , svo kíkti Trausti pabbi hans á laugardeginum, hann var að keyra karlakór Ísafjarðar til að halda tónleika í Salnum í Kópavogi. Um kvöldið var grillað saman áður er Trausti hélt aftur af stað vestur.
Magnús hélt uppi góðum félagsskap um helgina og fór svo á sunnudeginum heim með einum af rútum pabba síns. 
 Á sunnudeginum tók kallinn því rólega og horfði á fótbolta. Um kvöldið kom Knútur sonur Hreiðars og Fríðu. Knútur kokkur með meiru eldaði dýrindis máltið ofan í mannskapinn þ.e.a.s Kidda, Ernu, Hrólf, Hróar og Emmu. Í forrétt hvar hvítlauks leginn humar og lambalæri í aðalrétt ásamt góðu meðlæti. Það var borðað úti á svölum í glampandi sól og nýja borðið var vígt sem Össi mágur smíðaði. Þúsund þakkir fyrir geggjaðan kvöldverð þú ert ávallt velkominn Knútur
Svo var spilað örlítið á bassann, gítarana og hlustað á gamlar vínilplötur
kveðja Kiddi og co

Trausti frændi Kidda bauð honum á aldrei fór ég suður sem er tónlistarhátíð alþýðunnar á Ísafirði.
Trausti og Magnús sonur hans flugu til Reykjavíkur þriðjudagskvöldið fyrir páska til að sækja kallinn. Svo var haldið af stað á vit ævintýranna upp úr hádegi daginn eftir á bensanum hans Kidda. Ferðin gekk vel vestur þrátt fyrir smá snjó á steingrímsfjarðarheiði ( kallinum lá svo á að setja sumardekkin á fyrir 15 apríl,hehe) Trausti frændi er vanur bílstjóri búinn að keyra rútur í ca 30 ár, alvanur. Þeir voru ca 7 tíma á leiðinni með stoppum. Þeir voru komnir um kvöldmatarleytið á Ísafjörð og var þá fengið sér í gogginn. Kiddi dvaldi á sjúkrahúsi Ísafjarðar í góðu yfirlæti yfir páskahelgina. á miðvikudagskvöldið fór Kiddi snemma í háttinn eftir langa bílferð og svaf út. 
Á fimmtudeginum var safnað kröftum fyrir tónlistarhátíðina. Við Tausti og Magnús chilluðum heima hjá þeim. 
Svo rann föstudagurinn langi upp. Fórum í bíltúr í Bolungarvík og svo til Trausta í mat áður en haldið var á aldrei fór ég suður. Hljómsveitirnar sem komu fram það kvöld voru m.a Valdimar. Nýdönsk, Prins póló og Pétur Ben og voru þær frábærar. Kiddi fór upp á sjúkrahús rétt fyrir miðnætti, vel þreyttur.
Á laugardeginn var Kidda dröslað á fætur um kl.10 30. Kallinn tók því rólega þar og borðaði hádegismat á sjúkrahúsinu. Svo var kíkt á Suðureyri og Flateyri í sæmilega góðu veðri. Eftir það var kíkt til Trausta og tekið smá hvíld. Þar var boðið upp á lambalæri og með því. Svo var skundað niður í skemmu á tónleika. Það kvöld komu fram m.a Grafík, Sokkabandið, Bjartmar Gunnlaugsson og Senuþjófarnir ásamt fleiri góðum böndum. Flott kvöld í góðra vina hópi !!
Á páskadag fékk Kiddi dýrindis hamborgarahrygg á sjúkrahúsinu áður en var haldið var út. Stuttur bíltúr um  plássið og svo var því rekið rólega heima hjá Trausta og aftur borðaður hamborgarahryggur um kvöldið. Trausti kemur sífellt á óvart, ekki bara góður bílstjóri heldur afbrags kokkur í þokkabót. Síðan sá Magnús trommari og ljósmyndari með meiru um myndatökur um helgina og hægt er að sjá þær undir myndasöfn merkt á Ísafirði.
 Kiddi vill koma á framfæri þökkum til starfsfólks sem sá um hann á sjúkrahúsi Ísafjarðar fyrir frábæra ummönnum og hlýhug !!!
Á annan í páskum var haldið heim á leið upp úr hádegi í blíðskaparveðri.
Heimferðin gekk mjög vel. Stoppað var í Búðardal til að teygja úr sér. Stutt stopp í Borgarnesi, svo þegar heim á Norðurbakkann var komið mættu Hulda og Össi með tomma hamborgara fyrir banhungraða ferðalanga. Trausti og Magnús gistu um nóttina og tóku svo flugið heim vestur daginn eftir.
Kæru feðgar þúsund þakkir fyrir frábæra skemmtun á Ísafirði og allt það umstang sem mér fylgir. Það er ekki hægt að lýsa því í orðum hversu vænt mér þótti um þetta, ég á eftir að lifa á þessu lengi.
kær kveðja Kiddi